Ang Pagbabalik-loob
“Ang sinumang gumagawa ng kasamaan o
lumabag sa katarungan sa sarili niya, pagkatapos
ay hihingi siya ng tawad kay Allah, matatagpuan
niya na si Allah ay Mapagpatawad, Maawain.”
(Qur’an 4:110)
Ang Kainaman ng Pagbabalik-loob
Ang papuri ay ukol kay Allah at ang pagbabati at
ang pagpapala ay ukol sa Sugo ni Allah, sa mag-anak
niya at lahat ng Kasamahan niya.
May isang lalaki na pumunta kay Ibrahim ibnu
Ad'ham, kaawaan siya ni Allah, at nagsabi: “Tunay na
ako ay isang lalaking nagmamalabis sa sarili ko sa
pamamamagitan [ng paggawa] ng mga pagkakasala
kaya pangaralan mo ako.” Nagsabi si Ibrahim: “Kung
tatanggapin mo mula sa akin ang limang payo at
kakayanin mo ang mga ito, hindi ka mapipinsala ng
Ang Pagbabalik-loob
6
pagsuway [mo kay Allah] kailanman.” Kaya nagsabi
ang lalaki: “At ano ang mga ito?”
Nagsabi si Ibrahim: “Kapag ninanais mo na suwayin
si Allah ay huwag kang kumain mula sa biyaya Niya!”
Nagsabi ang lalaki: “Mula saan ako kakain, gayong
ang lahat ng nasa lupa ay bahagi ng biyaya Niya?”
Nagsabi si Ibrahim: “Maganda bang kakain ka mula
sa biyaya ni Allah at susuwayin mo Siya?”
Nagsabi ito: “Hindi. Ibigay mo ang ikalawa.”
Nagsabi si Ibrahim: “Kapag ninanais mo na suwayin
si Allah ay huwag kang tumira sa lupa Niya.”
Nagsabi ito: “Ito ay higit na mabigat kaysa sa una,
at saan naman ako titira?”
Nagsabi si Ibrahim: “Maganda bang kakain ka mula
sa biyaya ni Allah at titira sa lupa Niya at susuwayin
mo Siya?”
Nagsabi ito: “Hindi. Ibigay mo ang ikatlo.”
Nagsabi si Ibrahim: “Kung ninanais mo na suwayin
si Allah ay pumunta ka sa isang pook na hindi ka Niya
makikita roon. ”
Nagsabi ang lalaki: “Saan ako pupunta yamang si
Allah ay nakababatid sa lihim at hayag?”
Nagsabi si Ibrahim: “Maganda bang kakain ka mula
sa biyaya ni Allah at titira sa lupa Niya at susuwayin
mo Siya gayong Siya ay nakakikita sa iyo?”
Nagsabi ang lalaki: “Hindi. Ibigay mo ang ikaapat.”
Ang Pagbabalik-loob
7
Nagsabi si Ibrahim: “Kapag pumunta sa iyo ang
anghel ng kamatayan upang kunin ang kaluluwa mo
ay sabihin mo sa kanya: Palugitan mo ako hanggang
sa magbalik-loob ako at gumawa ako ng matuwid.”
Nagsabi ang lalaki: “Hindi siya tatanggap [ng hiling]
mula sa akin at hindi siya magpapalugit sa akin.”
Nagsabi si Ibrahim: “Kapag hindi mo nakaya na
itulak palayo sa iyo ang kamatayan upang magbalikloob
ka at manumbalik ka, papaano mong sinusuway
Siya?”
Nagsabi ang lalaki: “Ibigay mo ang ikalima.”
Nagsabi si Ibrahim: “Kapag pumunta sa iyo ang
mga [anghel na] tagatanod sa Impiyerno sa araw ng
Pagkabuhay upang dalhin ka nila sa apoy ay huwag
kang sumama sa kanila.”
Nagsabi ang lalaki: “Tunay na sila ay hindi magiiwan
sa akin at hindi sila tatanggap [ng hiling] mula
sa akin.”
Nagsabi si Ibrahim: “Kaya papaano kang makaaasa
na makaliligtas?”
Nagsabi ang lalaki: “Sapat na sa akin ito. Tunay na
ako ay humihingi ng kapatawaran sa Panginoon ko at
nagbabalik-loob sa kanya.”
Ang Pagbabalik-loob
8
Ipinag-utos ni Allah sa lahat ng mananampalatayang
lingkod Niya ang pagbabalik-loob. Sinabi Niya (24:31):
“Magbalik-loob kayong lahat kay Allah, o mga
Mananampalataya, nang harinawa kayo ay
magtagumpay. ”
Hinati Niya ang mga tao sa dalawang pangkat:
nagbabalik-loob at lumalabag sa katarungan sa sarili
niya. Sinabi Niya (49:11):
“Ang sinumang hindi nagbabalik-loob, ang mga
iyon ay ang mga lumalabag sa katarungan.”
Ang pangangailangan ng tao sa pagbabalik-loob
ay palagihan yayamang ang bawat anak ni Adan ay
nagkakamali, at ang pinakainam sa mga nagkakamali
ay ang mga nagbabalik-loob kay Allah, gaya nga ng
sinabi ng Sugo (SAS).
Tunay na ang kamalian na kinasadlakan ng marami
sa mga tao ay ang pagwawalang-bahala sa ilan sa mga
pagsuway. Sila ay sumusuway kay Allah sa gabi at araw.
Ang Pagbabalik-loob
9
Mayroon sa kanila na nagmamaliit sa pagsuway,
nagwawalang-bahala rito at hindi nagbibigay pansin
dito. Nagsabi si Ibnu Mas‘úd (RA): “Tunay na ang
mananampalataya ay nagtuturing sa mga pagkakasala
niya na para bagang siya ay nakaupo sa paanan ng
bundok na pinangangambahan niyang bumagsak ito sa
kanya. Tunay na ang masamang-loob ay nagtuturing
sa kanyang mga pagkakasala na para bagang langaw
na dumaan sa ilong niya at itinaboy niya ito palayo
sa kanya.”
Tunay na ang mananampalatayang matalino ay hindi
tumitingin sa kaliitan ng pagsuway subalit tinitingnan
niya ang kadakilaan ng sinuway niya (na si Allah).
Yayamang ang tao ay hindi napangalagaan laban sa
kasalanan, kaya naman binuksan ni Allah para sa mga
lingkod Niya ang pinto ng pagbabalik-loob at ipinagutos
din Niya ang pagbabalik-loob. Nagsabi si Allah
(39:53):
“O Aking mga lingkod na nagmalabis laban sa
mga sarili nila, huwag kayong mawalan ng pagAng
Pagbabalik-loob
10
asa sa awa ni Allah; pinatatawad ni Allah ang
lahat ng mga pagkakasala. Tunay na Siya ay ang
Mapagpatawad, ang Maawain.”
Nagsabi naman ang Sugo (SAS):
التائ ب م ن الذن ب ك من لا ذنب له
“Ang nagbabalik-loob mula sa pagkakasala ay gaya
ng isang walang pagkakasala.” (Isinalaysay ito ni
Imám Ibnu Májah)
Hindi lamang ito, kapag naging tapat ang pagbabalikloob,
papalitan ni Allah ang mga masamang nagawa
ng magandang gawa. Nagsabi si Allah (25:70):
“Maliban sa mga nagbalik-loob, sumampalataya
at gumawa ng gawang matuwid sapagkat ang mga
iyon ay papalitan ni Allah ang mga masamang
nagawa nila ng magandang gawa. Si Allah ay
laging Mapagpatawad, Maawain.”
Tunay na kabilang sa pinakamabigat sa nagagawang
mga kamalian ng isang Muslim ay ang pagpapaliban
sa pagbabalik-loob. Mayroon sa mga tao na nakatatalos
Ang Pagbabalik-loob
11
sa kanyang kamalian at nalalaman niya ang pagiging
bawal ng gawang nagawa niya subalit ipinagpapaliban
niya ang pagbabalik-loob. Ang tao ay hindi nakaaalam
kung kailan siya dadatnang ng taning ng buhay. Dahil
dito, kinakailangan sa tao na magmadali sa pagbabalikloob
kay Allah mula sa mga pagkakasala.
Tungkulin din ng isang tao na dalasan ang paghingi
ng kapatawaran sa lahat ng pagkakasala niya—ang
nalaman niya sa mga ito at ang hind niya nalaman.
Tungkulin ng isang Muslim na madaliin ang pagbabalikloob
kay Allah mula sa mga pagkakasala niya maging
gaano man kabigat ito at tungkulin niya ring malaman
na walang kawalang-pananampalataya na higit pang
mabigat kaysa sa pag-aangkin sa Pagkapanginoon [na
ukol kay Allah lamang].
Nabanggit sa Qur’an (28:38) na si Paraon ay nagsabi
sa mga kababayan niya:
“O mga maharlika, hindi ko nalamang kayo ay
may diyos na iba pa sa akin.”
Sa kabila nito ay isinugo pa ni Allah sa Kanya si
Moises upang anyayahan siya sa pagsisisi, pagbabalikloob
kay Allah at pananampalataya kay Allah. Nagsabi
si Allah (79:17-19) kay Moises:
Ang Pagbabalik-loob
12
“Pumunta ka kay Paraon; tunay na siya ay
nagmalabis. At sabihin mo sa kanya: “Ibig mo
ba na magpakalinis sa kasalanan at akin kang
patnubayan tungo sa Panginoon mo upang matakot
ka sa Kanya?”
Kung sakaling si Paraon ay tumugon at nagbalikloob,
talagang pinatawad sana siya ni Allah.
Dapat mo ring malaman na ang sinumang nagbalikloob
mula sa pagkakasala at pagkatapos nanumbalik
uli sa pagkakasala, tunay na tungkulin niya na muling
magbalik-loob at na tungkulin niyang ipagpatuloy na
ulit-ulitin ang pagbabalik-loob maging ilang ulit mang
naulit sa kanya ang pagkakasalang iyon at ang iba pang
pagkakasala.
Huwag siyang mawalan ng pag-asa sa awa ni Allah
Mayroon sa mga tao na nawawalan ng pag-asa sa awa
ni Allah. Iyon ay dahil din sa dami ng mga pagkakasala
nito at mga pagsuway nito, o na ito ay nagbalik-loob
na nang isa o higit pa at pagkatapos nanumbulik muli
sa pagkakasala at inaakala niyang si Allah ay hindi
magpapatawad sa kanya kaya nagpapatuloy na siya sa
pagkakasala, at nagpapabaya sa pagbabalik-loob at
Ang Pagbabalik-loob
13
panunumbalik kay Allah. Ito ay isa sa pinakamabigat
sa mga kamalian sapagkat walang nawawalan ng pagasa
sa awa ni Allah kundi ang mga taong tumatangging
sumampalataya.
Tunay na mayroon sa mga tao na nagpapabaya sa
pagbabalik-loob mula sa ilang uri ng mga pagsuway
dahil sa takot sa sasabihin ng mga tao o dahil sa takot
na maiwala niya, dahil sa pagbabalik-loob niya, ang
kalagayan niya sa lipunan na pinaninirahan niya o ang
gawaing pinagtatrabahuhan. Nakakalimutan niya na
siya ay mag-isang pupunta sa libingan niya, haharap
sa Panginoon niya at tatanungin sa mga nagawa niya.
Hindi makatutulong sa kanya si ganito at si gayon na
kabilang sa mga sumasagabal sa kanya sa pagbabalikloob
at humahalina sa paningin niya sa mga pagsuway.
Tungkulin ng tao na pakatandaan na ang sinumang magiwan
ng isang bagay alang-alang kay Allah, tutumbasan
siya ni Allah nang mainam kaysa sa iniwan niya.
Tunay na mayroon sa mga tao na nagpapatuloy sa
pagkakasala. Kapag pinagbawalan siya laban doon ay
nagsasabi siyang tunay na si Allah ay Mapagpatawad
at Maawain naman. Walang pagsala na ito ay isang
kamangmangan, isang kahangalan at isang panliligaw ni
Satanas sa ilang tao dahil tunay na ang awa ni Allah ay
para sa mga gumagawa ng mabuti hindi para sa mga
gumagawa ng masama na nagpapatuloy sa pagkakasala.
Ang Pagbabalik-loob
14
Tunay na si Allah, sa kabila ng pagpapaumanhin Niya
at awa Niya, ay matinding magparusa gaya ng sinabi
Niya (15:49-50):
“Ibalita mo sa mga lingkod Ko na Ako ay ang
Mapagpatawad, ang Maawain, at na ang Aking
pagpaparusa ay ang pagdurusang masakit.”
Ang mga Kundisyon sa Pagbabalik-loob
Tunay na ang tapat na pagbabalik-loob ay may mga
kundisyon na hinango ng mga pantas ng Islam mula sa
mga talata ng Qur’an at sa mga Hadíth. Ang ilan sa
mga ito ay ang sumusunod:
1. Ang kaagad na pagkalas sa pagkakasala,
2. Ang pagsisisi sa nagdaang mga pagkakasala,
3. Ang pagtitika (matibay na pagpapasya) na hindi na
muling magbabalik sa pagkakasala,
4. Ang pagsasauli sa mga karapatan ng mga nagawan
niya ng kawalang katarungan, o na hihingi sa kanila ng
paumanhin. Nagsabi ang Sugo (SAS):
Ang Pagbabalik-loob
15
“Ang sinumang may kawalang-katarungan na
nagawa sa kapatid niya [sa pananampalataya] sa
karangalan o isang bagay ay humingi na siya ng
paumanhin ngayon, bago mangyaring wala nang
dinar ni dirham [na ipambabayad] kundi ang mga
ginawang maganda at ang mga ginawang masagwa.”
(Isinalaysay ito ni Imám al-Bukhárí.)
Subalit ang sinumang hindi makakayang magsauli
ng mga karapatan ng ginawan ng kawalang katarungan
matapos gawin ang pagsisikap ay makaaasa siya sa
pagpapaumanhin ni Allah.
Ang ilan sa mga karapatan ay ang sumusunod:
1. Ang mga karapatang pang-ari-arian. Sa pamamagitan
ito ng pagsasauli (o pagbabayad) sa may-ari nito sa
anumang paraan o paghingi ng paumanhin doon. Kung
hindi niya nakikilala ang may-ari nito, o hinanap niya
iyon ngunit hindi niya nakita, o nakalimutan niya ang
halaga ng kinuha niya mula roon, siya ay magsasagawa
Ang Pagbabalik-loob
16
ng pagtataya sa halaga nito at magkakawanggawa ng
katumbas na halaga para sa taong iyon.
2. Ang mga karapatan sa kabayaran sa kapinsalaang
nagawa sa katawan. Magagawa ang pagbabalik-loob
sa pamamagitan ng pagpapahintulot sa nalabagan ng
karapatan na makakuha ng bayad pinsala sa karapatan
nito sa pamamagitan ng salapi o kaukulang kabayaran.
Maaari ring pagpaumanhinan siya nito. Kung hindi kilala
ang nalabagan ng karapatan, magkakawanggawa para
sa kanya at idadalangin siya.
3. Ang mga paglabag sa karapatan kaugnay sa mga
karangalan. Ang paglapag sa karapatang ito ay maaaring
panlilibak o maling paratang o pagkakalat ng paninirang
puri o paninira sa mabuting ugnayan. Hihingi siya ng
paumanhin sa nagawan niya ng masama, itutuwid niya
ang nasira sa abot ng makakaya at idadalangin niya
rin ito.
Ilan sa mga Uri ng Pagbabalik-loob
1. Ang pagbabalik-loob ng pumatay. Ang pumatay
nang sadya ay may tungkuling tugunin ang tatlong
karapatan:
A. Ang karapatan ni Allah. Ang pagtugon dito ay sa
pamamagitan ng matapat na pagbabalik-loob at
pagsisisi sa mabigat na krimen na iyon.
Ang Pagbabalik-loob
17
B. Ang karapatan ng mga tagapagmana ng napatay.
Ang pagtugon dito ay sa pamamagitan ng pagsuko
ng sarili sa awtoridad upang makamit nila ang
kabayaran sa karapatan nilang nilabag, na maaaring
sa pamamagitan ng hatol ng hukuman o pagbibigay
ng bayad-pinsala. Maaari rin nilang patawarin siya
nang walang kapalit.
C. Ang karapatan ng napatay. Hindi ito maaaring
matugon sa mundo. Kung magiging maganda ang
pagbabalik-loob ng pumatay at isinuko niya ang
sarili nila alang-alang sa mag-anak ng napatay,
tunay na si Allah ay mag-aalis sa kanya ng salang
pagpatay at tutumbasan naman Niya ang napatay
ng biyayang mula sa Kanya sa Araw ng Pagkabuhay.
2. Ang pagbabalik-loob ng nagpapatubo o kumikita sa
ribá.1 Sa pamamagitan ito ng pagtigil sa ribá, pagtitika
1 Ang ribá ay ang pagpapatubo o patubo sa utang o sa deposito sa bangko.
Ayon sa mga pantas ng Islam, ang salaping kinita sa pagpapautang ng pera
kapalit ng isang takdang bahagdan na patubo o interes, gaya ng five six,
at ang interes na ibinibigay ng bangko ay ribá. Ang pagtanggap at paggamit
ng interes na ibinibigay ng bangko ay harám ayon sa mga pantas ng Islam.
Subalit ano ang gagawin sa interes na ibinibigay ng bangko, yamang hindi
maiiwasang mag-impok ng pera sa bangko yamang wala namang tunay na
Islamic Bank sa Pilipinas? Sa isyu ng Magasin na ar-Rábitah, Septyembre
1995, ay nagsabi si Shaykh ‘Abdulláh ibnu Sulaymán ibni Maní‘, kasapi
ng Kapisanan ng mga Mataas na Pantas sa Kaharian ng Saudi Arabia:
“Kapag nag-impok ang isang Muslim ng salapi sa bangko sa
layuning ipatago lamang ito at wala namang mapagkakatiwalaang
Ang Pagbabalik-loob
18
na hindi manunumbalik doon at pagsisi sa nagdaang
pagkakasangkot doon. Tungkol naman sa yaman na
tinataglay ng nagpapatubo na nakamtan niya mula sa
ribá ay nagkaiba ang hatol ng mga pantas ng Islam.
Subalit itinututuring nina Ibnu Taymiyah, Ibnu Sa‘dí
at Ibnu ‘Uthaymín na may karapatan ang nagpapatubo
sa tinataglay niyang yaman na nakamtan niya noon sa
ribá bago siya nagbalik-loob. Hindi niya kinakailangan
na alisin ito, ngunit hahayaan na niya ang anumang
yamang makukuha pa sana niya mula sa ribá.
Ang Tapat na Pagbabalik-loob
Upang ang pagbabalik-loob ay tanggap, kailangang
ang pagbabalik-loob ay wagas na inuukol kay Allah.
Samakatuwid hindi matatawag na nagbalik-loob ang
sinumang tumigil sa pagkakasala dahil nakaaapekto
ito sa reputasyon niya o kalagayan sa trabaho. Hindi
institusyon para iimpok ang salaping ito bukod pa roon at nagbigay ang
bangkong pang-ribá ng mga interes para sa pananatili ng impok,
ipinahihintulot para sa nag-impok na kunin ang mga interes na ito at
gugulin ang mga ito sa mga guguling pangkawanggawa para sa mga
maralita at mga dukha para sa mga facility, na magagamit ng mga
Muslim, na hindi nakasasapat sa kanila. Hindi ipinahihintulot para sa
kanya na idagdag ito sa iba pang salapi niya, ni gawin ito na zakáh
niyon, ni gugulin ito sa anumang maituturing na pansarili. [Ito ay] bilang
pag-iingat para sa salapi niya [na baka mahaluan ng ribá], pagwawaksi
nito, at paghahadlang sa kaaway na makinabang dito o gugulin ito sa
ibang kaaway na makikinabang dito.”
Ang Pagbabalik-loob
19
matatawag na nagbalik-loob ang sinumang tumigil sa
mga pagkakasala dahil sa pangamba sa kalusugan niya
gaya ng tumigil sa pangangalunya dahil sa takot sa mga
nakahahawang sakit at iba pa.
Hindi matatawag na nagbalik-loob ang sinumang
tumigil sa pagnanakaw dahil hindi niya makayang
magnakaw o natatakot sa tanod at iba pang dahilan.
Hindi matatawag na nagbalik-loob ang sinumang
tumigil sa pag-inom ng nakalalasing o gumagamit ng
ipinagbabawal na mga gamot dahil namulubi na siya.
Hindi rin matatawag na nagbalik-loob ang sinumang
nawalan ng kakayahan, dahil sa bagay na labas sa
kanya kagustuhan, sa paggawa ng pagsuway.
Kailangan ding madama ng isang nagbalik-loob ang
kasagwaan ng pagkakasala. Ito ay nangangahulugan
na ang tunay na pagbabalik-loob ay hindi maaaring
mahaluan ng pagkadama ng sarap sa paggawa ng
kasalanan at galak kapag naalaala ang mga nagdaang
pagkakasala, at hindi rin maaaring mithiin ng nagbalikloob
ang magbalik doon sa hinaharap.
Kailangan ding alisin ang mga ipinagbabawal na
bagay na tinataglay gaya halimbawa ng mga bagay na
nakalalango (alak o bawal na gamot), mga kagamitan
sa musika, ipinagbabawal na mga larawan at mga video
film at gayon din ang paghiwalay sa mga kasamahan
sa kasamaan na nakatutulong sa kanya sa paggawa ng
Ang Pagbabalik-loob
20
mga pagsuway. Ang mga magkakasama sa kasamaan
ay magpapalitan ng sumpa sa Araw ng Pagkabuhay.
Dahil doon tungkulin ng isang nagbalik-loob na
makipaghiwalay sa kanila kung hindi niya makayang
anyayahan sila at ituwid sila. Maaaring udyukan ni
Satanas ang ilan sa mga nagbalik-loob na balikan ang
dating mga kasamahan sa kasamaan upang anyayahan
sila sa pagbabalik-loob gayong siya ay mahina at hindi
niya makakayang makaimpluwensiya sa kanila. Ito ay
magiging isang dahilan sa panunumbalik niya sa mga
pagkakasala. Tungkulin niyang pumili ng kapalit sa
kanila na mabuting kasamahan na makatutulong sa
kanya sa kabutihan at makapagtuturo sa kaniya rito.
Ang mga Bagay na Nakatutulong
sa Pagbabalik-loob
1. Ang katapatan kay Allah. Ito ay ang pinakakapakipakinabang
sa mga pamamaraan ng pagtigil sa mga
pagkakasala. Kapag naging tapat ang tao sa Panginoon
niya at nagpakatotoo sa paghiling ng pagbabalik-loob,
tutulungan siya ni Allah at ibabaling Niya palayo sa
kanya ang anumang makasasagabal sa pagbabalik-loob.
2. Ang pagpipilit (pakikibaka laban) sa sarili. Kapag
nakibaka ang tao laban sa sarili niya upang tigilan na
Ang Pagbabalik-loob
21
ang mga pagsuway, tutulungan siya ni Allah. Nagsabi
si Allah (29:69):
“Ang mga nakibaka alang-alang sa Amin ay
talagang papatnubayan nga Namin sila sa mga
landas Namin. Tunay na si Allah ay talagang
kasama ng mga gumagawa ng magaling.”
3. Ang pag-aalaala sa Kabilang-buhay. Kapag naaalaala
ng isang tao ang iksi ng buhay sa mundo at ang bilis ng
paglaho nito kasabay ng makakamtan sa Kabilangbuhay
na sari-saring lugod para sa mga masunurin at
matinding pagdurusa para sa mga masuwayin, tunay na
iyan ay magiging isa sa pinakamalaking mga hadlang
sa pagkakasadlak sa mga pagkakasala.
4. Ang pagkakaabala sa anumang napakikinabangan at
ang pag-iwas sa pag-iisa at kawalan ng ginagawa dahil
ang kawalan ng ginagawa ay isa sa pinakamahalaga
sa mga dahilan ng pagkasadlak sa mga pagkakasala.
Kaya kapag nagpakaabala ang isang tao sa anumang
nakapagdudulot ng pakinabang sa kanya sa kanyang
espirituwal at makamundong pamumuhay, hindi siya
magkakaroon ng pagkakataon para sa katiwalian.
Ang Pagbabalik-loob
22
5. Ang paglalayo sa mga pampaantig at sa anumang
maituturing na pagsuway. Samakatuwid, lalayuan ang
lahat ng nakapupukaw sa mga nag-uudyok sa pagsuway,
lalayuan ang lahat ng pumupukaw sa tawag ng laman
niya gaya ng panunuod ng mga malaswang pelikula,
pakikinig sa mga malaswang awitin, at pagbabasa ng
mga masamang aklat at mga mahalay na magasin.
6. Ang pakikisalamuha sa mga mabuting tao at ang
paglayo sa mga masamang tao. Ang pakikisalamuha
sa mga mabuting tao ay nakatutulong sa kabutihan,
nag-uudyok sa isang tao na tularan ang mga matuwid
na tao at pumipigil sa katiwalian.
7. Ang panalangin. Ito ay isa sa napakabisang mga lunas.
Ang panalangin ay sandata ng mga mananampalataya
at ang isa sa napakalakas na mga pamamaraan na
naipangtutugon sa mga pangangailangan. Nagsasabi
si Allah (40:60):
“Nagsabi ang Panginoon ninyo: Dumalangin kayo
sa Akin, tutugunin Ko kayo;”
Nagsasabi pa Siya (7:55):
Ang Pagbabalik-loob
23
“Manalangin kayo sa Panginoon ninyo nang may
kababaang-loob at palihim.”
Nagsasabi rin Siya (2:186):
“Kapag nagtanong sa iyo ang mga lingkod Ko
hinggil sa Akin ay sabihin mo: Tunay na Ako ay
malapit: tinutugon Ko ang panalangin ng nananalangin
kapag nanalangin siya sa Akin; kaya
dinggin nila Ako at sumampalataya sila sa Akin,
nang harinawa sila ay magabayan.”
Ang mga Pambayad sa Pagkakasala
Bahagi ng awa ni Allah sa Kanyang mga lingkod
na ang iba sa ilan sa mga pagsambang isinatungkulin
Niya sa Kanyang mga lingkod ay mga pambayad sa
mga maliit na pagkakasala. Ang ilan sa mga pambayad
sa pagkakasala ay ang sumusunod:
1. Ang limang pagdarasal. Nagsabi ang Sugo ni Allah
(SAS):
Ang Pagbabalik-loob
24
“Sa tingin ba ninyo kung sa pinto ng isa sa inyo ay
may isang ilog na masagana [na dumadaloy] na
pinaliliguan niya limang ulit sa bawat araw, may
matitira pa kayang anuman sa kanyang dumi?”
Nagsabi sila: “Wala na po, o Sugo ni Allah.” Nagsabi
siya: “Gayon din ang limang pagdarasal; pinapawi
ni Allah sa pamamagitan ng mga ito ang mga
pagkakasala at ang mga pagkakamali.”
2. Ang pagdalo sa Saláh sa Jumu‘ah. Nagsabi ang Sugo
(SAS):
من توضأ فأحسن الوضوء، ثم أتى الجمعة فاستمع وأنصت،
غفر له ما بينه وبين الجمعة الأخرى وزيادة ثلاثة أيام…
رواه مسلم
“Ang sinumang magsagawa ng wudú’ at pinaganda
niya ang pagsasagawa ng wudú’, pagkatapos ay
dumalo sa Jumu‘ah at nakikinig at nanahimik,
Ang Pagbabalik-loob
25
patatawarin siya sa mga kasalanang nagawa sa
pagitan ng [Jumu‘ah na] ito at Jumu‘ah na darating
at karagdagang tatlong araw.” (Isinalaysay ito ni
Imám Muslim.)
3. Ang pag-aayuno sa buwan ng Ramadán. Nagsabi
ang Sugo (SAS):
“Ang sinumang mag-ayuno sa buwan ng Ramadán
na may pananamplataya at pag-asang pagpapalain,
patatawarin ang nauna mula sa pagkakasala niya.”
Isinalaysay ito nina Imám al-Bukhárí at Imám
Muslim.
4. Ang pagsasagawa ng Hajj. Nagsabi ang Sugo (SAS):
“Ang sinumang nagsagawa ng Hajj at hindi
gumawa ng kahalayan at hindi sumuway, babalik
mula sa mga pagkakasala niya gaya ng araw na
Ang Pagbabalik-loob
26
isinilang siya ng ina niya.” Isinalaysay ito nina Imám
Málik at Imám al-Bayhaqí.
5. Ang pag-aayuno sa araw ng ‘Arafah. Nagsabi ang
Sugo (SAS):
“Ang pag-aayuno sa araw ng ‘Arafah ay nagbabayadsala
sa taon na nagdaan at nalalabi.” (Isinalaysay
ito ni Imám Ahmad.)
6. Ang mga kasawian at ang mga sakit. Nagsabi ang
Sugo (SAS):
“Walang dumadapo sa isang Muslim na pagod, ni
karamdaman, ni pagkabagabag, ni kalungkutan,
ni kapinsalaan, ni lumbay, pati na ang tinik na
ikinatitinik niya, nang hindi pinapawi ni Allah sa
pamamagitan niyon ang ilan sa mga pagkakamali
niya.” Isinalaysay ito nina Imám al-Bukhárí at Imám
Muslim.
Nagsabi pa ang Sugo (SAS):
Ang Pagbabalik-loob
27
“Ang sinumang pagnaisan ni Allah ng mabuti ay
palalasapin ng kasawian mula sa Kanya.” Isinalaysay
ito ni Imám al-Bukhárí.
7. Ang paghingi ng kapatawaran. Isa sa napakalaking
dahilan kaya pinapawi ni Allah ang mga pagkakasala ay
ang paghingi ng kapatawaran. Nagsabi si Allah (8:33):
“Hindi mangyayari na si Allah ay magpaparusa sa
kanila habang sila ay humihingi ng kapatawaran.”
Nagsabi naman ang Sugo (SAS):
“Pagpapala sa sinumang makatagpo sa talaan [ng
mga gawa] niya ng maraming paghingi ng tawad.”
Isinalaysay ito nina Imám Ibnu Májah at Imám al-
Bayhaqí.
Ang Pagbabalik-loob
28
Mga Tanong at mga Sagot
1. Tanong: Ibig kong magbalik-loob subalit ang mga
pagkakasala ko ay lubhang marami at hindi ko alam
kung patatawarin pa ba ako ni Allah sa lahat ng nagawa
ko sa loob ng nagdaang mga taon?
Sagot: Nagsasabi si Allah (39:53):
“O mga lingkod Ko na nagmalabis laban sa mga
sarili nila, huwag kayong mawalan ng pag-asa sa
awa ni Allah; tunay na si Allah ay nagpapatawad
sa lahat ng mga pagkakasala. Tunay na Siya ay
ang Mapagpatawad, ang Maawain.”
Nagsasabi naman si Allah Hadíth Qudsí:
يا ابن آدم إنك ما دعوتني ورجوتني، غفرت لك على ما كان
منك ولا أبالي؛ يا ابن آدم لو بلغت ذنوبك عنان السماء ثم
استغفرتني، غفرت لك ولا أبالي؛ يا ابن آدم لو أنك أتيتني
Ang Pagbabalik-loob
29
بقراب الأرض خطايا ثم لقيتني لا تشرك بي شيئا لأتيتك
بقرابها مغفرة.
“O anak ni Adan, tunay na ikaw, habang dumadalangin
ka sa Akin at umaasa ka sa Akin, ay
patatawarin Ko sa anumang [pagkakasala] mula
sa iyo at hindi Ko na papansinin. O anak ni Adan,
kung umabot man ang mga pagkakasala mo sa
mga alapaap ng kalangitan, pagkatapos ay humingi
ka ng kapatawaran sa Akin, patatawarin Kita at
hindi Ko na papansinin. O anak ni Adan, kung ikaw
man ay nagdala sa Akin ng kasinlaki ng mundo na
mga kasalanan at pagkatapos ay nakatagpo mo
Ako na hindi ka nagtatambal sa Akin ng anuman,
talagang dadalhan kita ng kasinlaki din niyon na
kapatawaran.” Isinalaysay ito ni Imám at-Tirmidhí.
Bagkus ang biyaya ni Allah sa mga lingkod Niya
ay lubhang higit na malaki pa roon sapagkat tunay na
ang sinumang nagtotoo sa kanyang pagbabalik-loob,
papalitan ni Allah ang nagdaang mga masamang gawa
niya ng mga mabuting gawa gaya nga ng sinabi Niya
(25:70):
Ang Pagbabalik-loob
30
“Maliban sa nagbalik-loob, sumampalataya at
gumawa ng gawang matuwid sapagkat ang mga
iyon ay papalitan ni Allah ang mga masamang gawa
nila ng magandang gawa.”
2. Tanong: Ibig kong magbalik-loob subalit ang mga
dating kasamahan sa kasamaan ay ayaw nila akong
lubayan at nakadarama ako ng panghihina, kaya ano
ang gagawin ko?
Sagot: Kailangan ang pagtitiyaga at ang pagpapatuloy
sa pagbabalik-loob. Ito ay bahagi ng pagsubok upang
makilala ang katapatan sa pagbabalik-loob sa hindi
katapatan, ngunit kailangang mag-ingat sa pagtalima
sa kanila sapagkat si Allah ay nagsasabi (30:60):
“Kaya magtiis ka, tunay na ang pangako ni Allah
ay totoo; at huwag ka ngang patatangay sa mga
hindi nakatitiyak.”
Ang Pagbabalik-loob
31
3. Tanong: Ibig kong magbalik-loob subalit ang mga
dati kong kaibigan ay nagbabanta sa akin na ihahayag
nila sa mga tao ang mga nakahihiyang nagawa ko;
mayroon silang mga litrato at mga dokumento at ako
ay natatakot naman na masira ang aking reputasyon,
kaya ano po ang gagawin ko?
Sagot: Una pigilin mo ang mga kampon ni Satanas
at dapat mong malaman na ang pakana ni Satanas ay
mahina. Pagkatapos ay dapat mo ring malaman na kung
ikaw ay susuko sa kanila, kukuha na naman sila ng
karagdagang mga patunay laban sa iyo at ikaw ang talo
sa simula at katapusan. Kaya manalig ka kay Allah at
sabihin mo: Sapat na sa akin si Allah at kay inam Niya
na Pinananaligan. Ang Sugo ni Allah (SAS) noon, kapag
may pinangangambahan siyang mga tao, ay nagsasabi
siya ng ganito:
alláhumma inná naj‘aluka fí nuhúrihim wa
na‘údhu bika min shurúrihim (O Allah, tunay
na kami ay naglalagay sa Iyo sa mga leeg nila at
nagpapakupkop sa Iyo laban sa mga kasamaan
Ang Pagbabalik-loob
32
nila.) Isinalaysay ito nina Imám Ahmad at Imám
Abú Dáwud.
Totoong ang ganitong kalagayan ay mahirap, subalit
si Allah ay kasama ng mga nangingilag magkasala: hindi
Niya sila iniiwan sa sandali ng pangangailangan. Kunin
mo ang kuwentong ito na isang napakainam na patunay
sa tulong ni Allah sa mga nangingilag magkasala. Ito
ay tungkol kay Murthad ibnu Abí Murthad na isang
Kasamahan ng Sugo (SAS). Itinatakas niya mula sa
Makkah papuntang Madinah ang mga inaapi sa mga
Muslim. Sa Makkah ay may isang babaeng nagbibili ng
aliw na tinatawag na ‘Unáq. Ito ay kasintahan niya noon.
Minsan ay nangako siya sa isang lalaki na dadalhin
niya ito sa Madínah.
“Humayo ako hanggang sa humantong ako sa lilim
ng isang pader sa isang gabing maliwanag ang buwan,”
sabi ni Murthad, “ngunit dumating din si ‘Unáq at
nakita niya ako. At nang nakalapit na siya ay nakilala
niya ako.”
“Tayo na, magkasama nating pagsaluhan ang gabing
ito,” sabi nito.
“ ‘Unáq, ipinagbawal ni Allah ang pangangalunya,”
sabi ko naman.
“Mga kalalakihan, ang lalaking ito ay nagdadala ng
mga bihag ninyo,” sumbong nito.
Ang Pagbabalik-loob
33
“Kaya sinundan ako ng walong tao hanggang sa
makarating ako sa isang yungib,” sabi ni Murthad, “at
pinasok ko ito at dumating sila hanggang sa tumayo
sila sa tabi ng ulo ko ngunit hindi ipinahintulot ni Allah
na makita nila ako. Pagkatapos ay umuwi na sila at
binalikan ko naman ang kasamahan ko at dinala ko
siya sa Madínah.”
Ganyan nagtatanggol si Allah sa mga mananampalataya
at mga nagbabalik-loob.
Pagkatapos kung mabubunyag man ang bagay na
kinatatakutan mo at mangangailangan ng paglilinaw,
ipaliwanag mo ang iyong katayuan sa ibang mga tao
at sabihin mong, “Oo, ako noon ay makasalanan ngunit
nagbalik-loob na ako kay Allah.”
Pakatandaan natin na ang tunay na kahihiyan ay ang
magaganap sa harap ni Allah sa Araw ng Pagkabuhay
at sa harap ng lahat ng nilikha: mga anghel, mga jinní,
at mga tao.
4. Tanong: Ako ay nakagagawa ng pagkakasala ngunit
nagbabalik-loob ako. Pagkatapos ay napapanaigan ako
ng sarili ko kaya nababalikan ko iyon! Mawawalan
ba ng kabuluhan ang unang pagbabalik-loob ko at
mananatili ba sa akin ang kasalanan sa una at huling
pagkakasala?
Ang Pagbabalik-loob
34
Sagot: Sinumang magbalik-loob mula sa pagkakasala
ay tatanggapin ni Allang ang pagbabalik-loob niya.
Kung muli siyang nanumbalik sa pagkakasalang iyon,
siya ay magiging gaya ng isang nakagawa ng bagong
pagsuway. Tungkulin niyang magbalik-loob kay Allah
mula roon. Ang unang pagbabalik-loob niya ay tanggap.
5. Tanong: Matatanggap ba ang pagbabalik-loob mula
sa isang pagkakasala samantalang ako ay nagpapatuloy
pa rin sa ibang pagkakasala?
Sagot: Tinatanggap ba ang pagbabalik-loob mula sa
isang pagkakasala kahit pa man nagpapatuloy sa ibang
pagakakasala kung ito ay hindi kabilang sa mismong
uri ng pagkakasalang pinagsisihan na. Halimbawa,
kung nagbalik-loob kay Allah mula sa pakikinabang
sa ribá ngunit hindi nagbalik-loob mula sa pag-inom ng
alak, ang pagbabaik-loob niya mula sa ribá ay tanggap.
Subalit ang sinumang nagbalik-loob mula sa pag-inom
ng alak ngunit siya naman ay patuloy sa paggamit ng
mga bawal na gamot, o nagbalik-loob mula sa pangangalunya
sa isang babae ngunit siya naman ay patuloy
sa pangangalunya sa ibang babae, ang pagbabalikloob
na ito ay hindi tanggap.
6. Tanong: Pinabayaan ko ang ilan sa mga pagsambang
kailangang gampanan tulad ng mga pagdarasal (saláh),
Ang Pagbabalik-loob
35
pag-aayuno, at pagbibigay ng zakáh, kaya ano po ang
gagawin ko?
Sagot: Tungkol naman sa pinabayaang pagdarasal,
hindi kinakailangan ang pagsasagawa ng Qadá’ para
rito, subalit matutumbasan ito ng tapat na pagbabalikloob,
pagpapanatili nito, at ang madalas na paghingi
ng kapatawaran. Harinawang si Allah ay magpatawad
niyon.
Tungkol naman sa hindi pag-aayuno, kung siya ay
Muslim noong hindi niya isinasagawa ang pag-aayuno,
siya ay kinakailangang magsagawa ng Qadá’ kalakip
ng pagpapakain sa isang dukha sa bawat araw na hindi
nag-ayuno.
Tungkol naman sa zakáh, kinakailangang ibigay ang
hindi naibigay.
7. Tanong: Nagnakaw ako ng mga ari-arian mula sa
mga tao at nagbabalik-loob na ako kay Allah subalit
hindi ko nalalaman ang mga address nila?
Sagot: Kailangan mong hanapin sila sa abot ng iyong
makakaya. Kung matatagpuan mo sila ay isauli mo ang
kinuha mo sa kanila. Kapag namatay ang may-ari ng
ninakaw ay ibibigay ang ninakaw (o ang kapalit) sa mga
tagapagmana nito. Kung hindi mo sila natagpuan sa
kabila ng masigasig na paghahanap sa kanila, magkawanggawa
ka alang-alang sa kanila at maglalayon ka
Ang Pagbabalik-loob
36
ng ganito alang-alang sa kanila. At kung sila man ay
mga di-Muslim, si Allah ay magbibigay sa kanila ng
gantimpala sa mundo ngunit hindi Siya magbibigay
sa kanila sa Kabilang-buhay.
8. Tanong: Nakagawa ako ng salang pangangalunya,
kaya paano akong magbabalik-loob? Kung nagdalangtao
ang babae, ang batang ito ba ay maituturing na legal
na anak ko?
Sagot: Kapag ang pangangalunya ay may pahintulot
at pagsang-ayon ng babae, wala kang kinakailangang
gawin kundi ang magsagawa ng pagbabalik-loob. Hindi
isusunod sa apelyedo mo ang magiging anak at hindi
ka inoobligang sustentuhan ang bata2 dahil siya ay anak
sa pangangalunya. Ang tulad ng batang ito ay isusunod
sa apelyedo ng ina.
Hindi ipinahihintulot sa nagbabalik-loob na ito na
magpakasal sa babeng ito upang pagtakpan lamang ang
kahihiyan. Subalit kung nagbalik-loob ang lalaki at
nagbalik-loob din ang babae nang tapat na pagbabalikloob,
walang masama na pakasalan ng lalaki ang babae
matapos na wala nang laman ang sinapupunan mula
sa pagdadalang-tao.
2 Subalit walang masama kung magkukusang-loob na sustentuhan ito.
Ang Pagbabalik-loob
37
Subalit kung ang pangangalunya ng isang lalaki ay
panggagahasa sa babae at paggamit ng dahas rito, sa
ganitong kalagayan ay kinakailangan na magbigay ang
lalaki sa babae ng Mahr na tulad ng ibibigay sa kanya
[kung pakakasalan siya], bilang kabayaran sa ipinataw
niyang pinsala sa babae, at na magbabalik-loob siya
nang tapat na pagbabalik-loob kalakip ng pagpapataw
sa kanya ng takdang parusa para sa pangangalunya3
kapag nakarating ang asunto sa hukuman.
9. Tanong: Nakapag-asawa ako ng lalaking matuwid
ngunit nakagawa ako ng mga bagay na hindi ikalulugod
ni Allah bago makapag-asawa, kaya ano po ang aking
gagawin?
Sagot: Kailangan mong magsagawa ng isang tapat na
pagbabalik-loob at hindi mo kinakailangang ipabatid
sa asawa mo ang ginawa mo noon.
10. Tanong: Ano ang kinakailangang gawin ng isang
nagbabalik-loob mula sa paggawa ng kahalayan ng
sodomy?
Sagot: Ang kinakailangang gawin ng gumagawa ng
sodomy at ginagawan ng sodomy ay magsagawa ng
malaking pagbabalik-loob dahil hindi niya nalalaman
3 Kamatayan para sa nanggahasa kung siya ay may asawa o nagkaroon
na ng asawa.
Ang Pagbabalik-loob
38
na si Allah ay nagpababa ng sari-saring parusa sa isang
sambayanan gaya ng ibinaba Niya sa mga kababayan
ni Lot dahil sa kasagwaan ng kanilang krimen. Ito ang
mga ginawa Niya:
A. Inalis ang kanilang paningin,
B. Pagkatapos ay nagpadala sa kanila ng dagundong,
C. Pagkatapos ay hinugot ang mga tahanan nila, itinaas
ang mga ito, itinaob at ibinagsak,
D. Pinaulanan sila ng mga bato na natuyong putik na
pinagpatong-patong at nilipol silang lahat.
Dahil doon nagsabi ang Sugo (SAS): “Sinumang
matagpuan ninyo na gumagawa ng ginawa ng mga
kababayan ni Lot ay patayin ninyo ang gumagawa
ng kahalayan at ang ginagawan ng kahalayan.”
Isinalaysay ito nina Imám Abú Dáwud, Imám at-
Tirmidhí at Imám Ibnu Májah.
Kaya naman inoobliga ang sinumang nakagawa ng
tulad ng gawaing ito na magsagawa ng isang tapat na
pagbabalik-loob at madalas na paghingi ng tawad kay
Allah.
Sa pagwawakas, pakatandaan mo mahal na kapatid
na si Allah ay higit na maawain sa mga lingkod Niya
kaysa sa isang ina sa anak nito. Ang magpapakatotoo
sa pagbabalik-loob niya ay tatanggapin ni Allah ang
pagbabalik-loob niya. Ang pinto ng pagbabalik-loob
ay nakabukas, hindi isinasara [habang may buhay pa].
